Flýtilyklar
GUNNAR NELSON MEIDDUR OG FÓR Í AÐGERÐ
Okkar maður Gunnar Nelson meiddist á hné og gekkst undir aðgerð í gær sem tókst vel. Þessi tíðindi þýða því miður að fyrirhuguðum bardaga hans gegn Neil Magny í Liverpool, 27. maí næstkomandi, hefur verið aflýst.
“Svekktur er ekki nægjanlega sterkt lýsingarorð til að segja hvernig mér líður. Þetta er alveg ömurlegt en ég get ekkert gert í þessu annað en að sætta mig það og líta á björtu hliðarnar. Ég get tekið margt jákvætt úr undrbúningsferlinu og ég mun halda áfram að vaxa sem bardagamaður þó svo að ég þurfi að vera á hliðarlínunni ögn lengur,” segir Gunnar Nelson og bætir við:
"Æfingar voru búnar að ganga frábærlega fram að því að þetta gerðist. Öflugir bardagamenn víðsvegar að úr heiminum eru búnir að vera með mér í æfingabúðunum og enn fleiri voru á leiðinni. Andinn hefur verið virkilega góður og mér hefur sjaldan liðið betur en einmitt núna. Eftir að hafa verið í talsvert löngu hléi frá búrinu þá fann ég sterkt hvað hungrið var farið að segja til sín og ég var farinn að hlakka virkilega mikið til að fara til Liverpool og minna á mig.”
Gera má ráð fyrir að Gunnar verði fjarri góðu gamni í nokkrar vikur á meðan hann jafnar sig á meiðslunum. Aðgerðin í gær tókst vel og Gunnar segist vonast til að geta verið kominn fljótt á ról aftur.
“Ég ætti að geta byrjað að æfa af fullum krafti aftur uppúr miðju sumri og ég get þá gert mér vonir um að berjast með haustinu ef allt fer að óskum. Svona er bardagabransinn. Meiðsli eru hluti af þessu og ég innstilli mig bara á að koma sterkur til baka. Ég stefni klárlega á bardaga á þessu ári,” segir Gunnar að lokum.
 |
 |
Mjölnir MMA
