Siðareglur Mjölnis

Siðareglur þessar eiga við um starfsmenn félagsins, alla þjálfara, yfirþjálfara, aðstoðar þjálfara, afleysingarþjálfara, almenna þjálfara, aðra starfsmenn, stjórnarmenn og þá sem koma að öðru starfi á vegum félagsins. Allir sem taka að sér störf fyrir félagið skulu kynna sér þessar siðareglur og fylgja þeim í hvívetna.

Komi upp vafi um þessar reglur, svo sem um túlkun eða hvort þær gilda um tiltekna einstaklinga, skal stafsmaður snúa sér til yfirmanna Mjölnis um skýringar. Slíkt telst ekki vera brot á þeim trúnaði sem reglurnar kveða á um að skuli ríkja.

Reglur nr. 1-10 eiga sérstaklega við samskipti starfsmanna félagsins við börn. Til barns teljast þau sem eru yngri en 18 ára. Barn í þessu tilfelli getur bæði verið iðkandi og starfsmaður eða sjálfboðaliði í Mjölni. Reglur 11-17 eiga sérstaklega við samskipti við eldri iðkendur og samstarfsmenn. Yfirmenn teljast til formanns, framkvæmdastjóra og/eða aðstoðarframkvæmdarstjóra.

1. Beittu barn, eldri iðkanda eða samstarfsmann aldrei andlegu, líkamlegu eða kynferðislegu ofbeldi.[1]
2. Leggðu barn, eldri iðkanda eða samstarfsmann aldrei í einelti.
3. Tilkynntu strax til yfirmanns ef þú hefur grun um að barn, eldri iðkandi eða samstarfsmaður sé beittur ofbeldi (andlegu, líkamlegu, kynferðislegu eða einelti). Trúnaði milli starfsmanns og iðkanda er ávallt heitið með tilliti til reglu 9.
4. Starfsfólk ætti ekki að vera vinir barna undir 18 ára sem eru í þjálfun hjá þeim eða í tengslum við starfsins vegna. Ef þú ert vinur barns undir 18 ára aldri á samfélagsmiðlum þá skaltu haga samskiptum í samræmi við þessar siðareglur. Hafðu það í huga að iðkendur sjá allt sem þú póstar, jafnvel þó það sé ekki ætlað þeim sérstaklega. Athugaðu það einnig að yfirmenn geta krafist þess að sjá samskipti þín sem þú átt við barn sem er undir 18 ára aldri. Ef þarf að eiga samskipti við iðkendur undir 18 ára er æskilegt að þau fari í gegnum forsjáraðila eða þeir séu með í samskiptum.
5. Sinntu iðkendum á æfingum en þess utan skaltu halda þig í faglegri fjarlægð. Forðastu samskipti í gegnum síma og Internetið nema til boðunar æfinga og upplýsingagjafar sem ávallt eiga að fara í gegnum umsjónarmann.
6. Taktu aldrei að þér akstur iðkenda á æfingu eða á mót, nema með vitneskju og leyfi foreldra. Skriflegt leyfi foreldris þarf að fylgja ef barn er að fara á keppni eða í ferðalag án foreldis eða forráðamanns.
7. Forðastu öllu jöfnu að vera ein/n með barni, ekki loka að þér eða skutla barni heim sem er ekki bundið þér fjölskylduböndum (ath. reglu 6). Við sérstakar aðstæður svo sem ef barn meiðist á æfingu eða í keppni og þjálfari þarf að bregðast við, þá á alltaf að láta foreldri/forráðamann vita og fylla út atvikaskýrslu. Slík atvik kunna að heimila undantekningu frá þessari reglu, svo sem til að aka barni á bráðamóttöku.
8. Aldrei eiga í samskiptum við barn með kynferðislegum undirtóni eða vísa í eitthvað slíkt.
9. Ekki vera með niðrandi athugasemdir um foreldra/forráðamenn eða aðra fjölskyldumeðlimi iðkanda, mótherja, samherja, dómara eða aðra sem að starfinu snúa.
10. Sem starfsmaður ert þú bundinn trúnaði vegna persónulegra upplýsinga sem þú verður áskynja í starfi. Lög um barnavernd ganga þó þessu ákvæði framar, í aðstæðum þar sem barn segir þér í trúnaði að það hafi orðið fyrir ofbeldi þá ber þér skylda til að tilkynna það til yfirmanns. Ef þér er sagt í trúnaði að eldri iðkandi eða samstarfsmaður sé í hættu eða upplýsingar fást sem gefa til kynna að starfsmaður eða iðkandi sé að brjóta á rétti annars, samkvæmt hegningarlögum og/eða siðareglum Mjölnis svo talið er að hætta stafi af, þá skal tilkynna það til yfirmanns. Þetta má gera með því að tala beint við yfirmann eða með því að senda yfirmanni tölvupóst merkt ,,trúnaðarmál“.
11. Þjálfara er ekki heimilt að eiga í samskiptum með kynferðislegum undirtóni eða vísa í eitthvað slíkt við iðkanda sem er nýr í Mjölni, þ.e. sem sækir grunnnámskeið í fyrsta sinn, nema slíkt samband hafi verið til staðar áður en iðkandinn hóf æfingar, taka verður þó tillit til reglu 13.
12. Þjálfara keppnisliðs er ekki heimilt að eiga í samskiptum með kynferðislegum undirtóni eða vísa í eitthvað slíkt við meðlimi keppnisliðs, sem hann þjálfar, nema slíkt samband hafi verið þegar til staðar áður en iðkandinn hóf æfingar með liðinu, með tilliti til reglu 14. Ef þjálfari og meðlimur liðsins eiga í sambandi ber að láta yfirþjálfara liðsins vita.
13. Þjálfari skal ávallt vera fagmannlegur í samskiptum sínum við iðkanda og eigi ekki í samskiptum með kynferðislegum undirtóni eða vísa í slíkt meðan iðkandi sækir æfingar í Mjölni. Undantekningar geta þó verið á þessari reglu ef þjálfari og iðkandi fella hugi saman, þó með tilliti til reglu 14.
14. Þjálfari er ávallt fagmannlegur þegar hann stýrir æfingu og á ekki í samskiptum með kynferðislegum undirtóni við maka ef hann er á æfingu.
15. Starfsmönnum er óheimilt að vera með niðrandi athugasemdir um iðkanda eða aðra starfsmenn svo sem um holdafar, líkamlegt atgervi, kynþátt, kynhneigð, trúarskoðanir eða stjórnmálaskoðanir iðkanda.
16. Ekki misnota stöðu þína innan félagsins í fjárhagslegum tilgangi fyrir þig eða þér tengda á kostnað félagsins.
17. Ekki notafæra stöðu þína innan félagsins til eigin framdráttar á kostnað félagsins.

Þjálfarar Mjölnis skulu ávallt hafa í huga að þeir eru fyrirmyndir, leiðbeinendur, yfirvald og jafnvel foreldraímyndir. Ég hef kynnt mér reglurnar og það ferli sem fer í gang ef upp kemst um brot.

Brot á siðareglum Mjölnis

- Verkferli -

Ef iðkandi, foreldri, stjórnarmaður, starfsmaður, félagsmaður, sjálfboðaliði eða einhver annar telur að þessar siðareglur hafi verið brotnar getur hann vísað málinu til stjórnenda Mjölnis sem koma málinu í réttan farveg. Hægt er að hafa beint samband við framkvæmdarstjóra Mjölnis í síma eða með því senda póst merkt trúnaðarmál (halli@mjolnir.is). Með réttan farveg er átt við að málið sé tekið upp á framkvæmdastjórafundi og/eða stjórnarfundi.

Ef um er að ræða ofbeldisbrot gegn barni er málinu komið til barnaverndar, til þjónustumiðstöðvar eða til lögreglu eftir því sem við á, og eftirvinnsla máls unnin í samvinnu við viðkomandi stofnun.

Ef upp koma mál sem snúa að kynferðisbroti, sbr. 22. kafla hegningarlaga, eða þar sem öðru líkamlegu ofbeldi hefur verið beitt er stjórnendum skylt að hafa samband við lögreglu. Hér skal þó fara fram af varúð og tillitssemi og hafa samráð við þolendur eins og hægt er séu þeir sjálfráða.

Brot á reglum 11.-14. skulu alltaf vera tekin upp á fundi með viðkomandi þjálfara og stjórnendum, og það skal gerast um leið og staðfestur grunur um brot liggur fyrir.

Brot á siðareglum Mjölnis geta varðað brottrekstur úr starfi og eða úr félaginu.

Stjórnendur í samráði við stjórn Mjölnis taka ákvörðun eftir að mál hefur verið tekið fyrir, og þá hvort að:

• Málið verði látið niður falla
• Veitt verði áminning
• Hvort viðkomandi verði vikið tímabundið út starfi
• Hvort viðkomandi verði vikið varanlega úr starfi
• Vísa eigi máli til viðeigandi yfirvalda (lögreglu og/eða barnaverndaryfirvalda).

Allir þeir sem koma að starfi hjá Mjölni þurfa að skrifa undir þessar siðareglur áður en þeir hefja störf. Þær verða einnig kynntar fyrir iðkendum og verða aðgengilegar á heimasíðu Mjölnis þar sem þær verða aðgengilegar öllum iðkendum og foreldrum barna- og unglingahópa.