1. ALLIR HAFA GAMAN OG ENGINN SLASAST - Þetta er mikilvægasta reglan í Mjölni. Allir eiga að skemmta sér, líða vel og hafa gaman og enginn á að slasast. Þó við höfum starfrækt bardagaíþróttaklúbb til fjölda ára er slysatíðnin hjá okkur afar lág. Af hverju? Vegna þess að við höfum starfsfólk, þjálfara og iðkendur sem skapa og ýta undir heilbrigt umhverfi við æfingar. Hér að neðan eru nokkrar einfaldar leiðbeiningar sem munu hjálpa þér við að forðast meiðsli og að meiða æfingafélaga þína:
a. Aldrei æfa gróft eða fantalega - Það er munur á því að æfa ákveðið og því að æfa gróft eða af fautaskap. Okkur er annt um hvert annað, við erum vinir, félagar og fjölskylda. Við viljum enga fanta í Mjölni og þeir sem fara í æfingar af fautaskap eða af hörku og óvarkárni verða beðnir um að yfirgefa félagið okkar – æfingar ganga út á að læra, ekki að meiða. Ef við þurfum að útskýra þetta nánar fyrir þér þá er það ekki góðs viti.
b. Gefið alltaf merki um uppgjöf ef þið finnið til eða óttist meiðsli - Smán saman munið þið þekkja muninn á óþægindum og sársauka. Gleymið öllu harðhausa bulli um að sársauki sé undanfari styrks eða geri ykkur hörð. Sársauki er skilaboð frá líkamanum um að hann sé að verða fyrir meiðslum og það er ekkert töff eða gáfulegt við að hunsa slík skilaboð. Ef þið eruð í vafa þá gefið strax skýrt merki um uppgjöf (klappmerki (tap out)/uppgjöf í boxi). Klappið snemma, klappið ákveðið og klappið á æfingafélaga ykkar ef þess er nokkur kostur, ekki á dýnurnar.
c. Virðið alltaf uppgjafarmerki umsvifalaust - Hvort sem þið teljið ykkur vera með yfirhöndina eða ekki, ef einhver gefur merki um uppgjöf þá hættið þið strax. Engar undantekningar!
d. Öll uppgjafartök eru gerð varlega - Aðalsmerki góðra glímumanna eru að þeir geta klárað tök sín rólega. Það er vissulega tími fyrir snarpar og snöggar hreyfingar í glímunni en þegar kemur að lokastigi uppgjafartaks er það alltaf gert hægt og gætilega þannig að æfingafélaginn hafa nægan tíma til að gefast upp. Geri hann það ekki skaltu útskýra fyrir honum að hann eigi að gefa merki um uppgjöf án þessa að t.d. lásinn sé settur á að fullu. Gefist hann samt ekki upp skaltu bara sleppa lásnum.
e. Ýmsir fótalásar og mörg önnur tök eða brögð eru óheimil nema hjá mjög langt komnum keppendum gegn hvor öðrum - Fáðu leiðbeiningar hjá þjálfaranum þínum áður en þú reynir tök eða brögð sem þú ert ekki viss um hvort eru leyfileg. Gerðu engar tilraunir út í loftið með þína heilsu og annarra. Einnig er með öllu bannað að grípa í fingur, eyru, hár eða skinn. Ekki aðeins er slíkt tilgangslítið glímulega séð heldur mun það meiða og ergja æfingafélaga þína. Auk þess er það siðlaust.
f. Verið ávallt með viðeigandi hlífðarbúnað - Notið alltaf þann hlífðarbúnað sem hæfir tilefninu. Þetta geta verið tannhlífar, eyrnahlífar, höfuðhlífar, legghlífar, punghlífar eða hvað annað sem við á hverju sinni.
2. SÝNDU HEILINDI OG VERTU FYRIRMYND - Þessi regla leggur áherslu á heiðarleika iðkenda og háttvísi. Kynntu þig áður en átökin byrja til að kynnast æfingafélaganum. Ef þú vilt hita upp með rólegum átökum (rólegri glímu (slow roll)/rólegu boxi (slow boxing/sparring)) vertu þá viss um að það sé gagnkvæmur skilningur milli þín og æfingafélagans að svo sé og vertu viss um að halda þig við þann hraða. Það er enginn sigurvegari í rólegum átökum. Ef þú vilt takast á af fullu kappi þá segðu það strax í byrjun og þá er allt í góðu. Ef þú hefur ekki sömu reynslu og sá sem þú ert að fara að æfa með, láttu hann þá vita af því. Ekki heldur vera „dýnuhákarl“ (mat shark) og leita að „auðveldri bráð“ í salnum. Og ekki taka ólögleg efni. Það er bæði bannað og líka svindl! Vertu kurteis, sýndu háttvísi og heilindi og þér mun vegna vel. Mundu að:
a. Þú vilt ekki er vera sá sem biður æfingafélaga um að fara rólega en ferð svo skyndilega í keppnisgírinn þegar þú sérð tækifæri opnast.
b. Þú vilt ekki vera sá sem situr á hliðarlínunni og hvílir þig en biður svo einhvern sem búinn er að æfa allt kvöldið um að æfa með þér – bara svo þú eigir betri möguleika á að „vinna.“
c. Þú vilt ekki vera svindlari og lögbrjótur. Mjölnir fordæmir notkun stera og annarra ólöglegra efna. Notkun eða varsla á slíku er með öllu óheimil í Mjölni og slíkum málum verður umsvifalaust vísað til lögreglu. Enga svindlara í Mjölni!
d. Þú vilt ekki vera dóni. Vertu aldrei óviðeigandi, hvorki í tali né gjörðum, niðrandi eða með kynferðislegum undirtóni eða vísa í eitthvað slíkt. Það er ekki bara meiðandi og ósmekklegt heldur getur hreinlega verið saknæmt áreiti. Vertu háttvís og til fyrirmyndar.
3. ÞJÁLFARINN RÆÐUR FERÐINNI - Mættu tímanlega á æfingar og mundu að þjálfararnir stýra þeim. Enga sígjammandi „hliðarlínuþjálfara“ takk.
Ef æfing er í gangi þá er það þjálfarinn sem segir til um hvenær eigi að hvíla. Ef þú hættir að æfa til að binda beltið þitt, fá þér vatn eða gera eitthvað slíkt meðan æfingafélagar þínir halda áfram þá ertu bara að svindla á sjálfum þér. Undantekning á þessu er að sjálfsögðu ef þér líður á einhvern hátt illa, svimar eða finnur fyrir meiðslum. Þá skaltu láta þjálfarann vita af ástandinu og taka þér þá hvíld sem þú þarft til að halda heilsu.
Þegar þjálfarinn talar, þá hlustar þú. Það á engin truflun, samræður eða „hliðarlínuþjálfun“ að vera í gangi á meðan að þjálfarinn er að segja fólki til. Hættu því sem þú ert að gera þegar í stað, hlustaðu og farðu eftir leiðbeiningum þjálfarans. Þetta hefur ekki bara með virðingu við þjálfarann að gera heldur þína eigin framför og annarra iðkenda, sem og öryggi allra.
Ef einhverra hluta vegna þú telur þig ekki geta eða vilja fara að fyrirmælum þjálfarans skaltu ræða það við hann milliliðalaust. Allt starfsfólk Mjölnis er á staðnum til að aðstoða iðkendur og mun liðsinna þér af fremsta megni. Þín líðan skiptir okkur máli.
4. REGLUM BER AÐ FYLGJA - Reglur eru ekki settar af því bara og þær gilda fyrir alla iðkendur, ekki bara suma:
a. Aldurstakmark í lyftingasali er 16 ár nema í fylgd með þjálfara. Bannað er að vera með börn í lyftingasölunum.
b. Ekki taka frá pláss í tíma sem þú notar ekki, þú ert að taka hann frá öðrum. Í marga tíma þarf að bóka fyrirfram á vefnum eða í gegnum smáforritið (appið). Kynntu þér hvaða tímar það eru og mundu að afbóka þarf bókaðan tíma að minnsta kosti 60 mínútum áður en tíminn á að hefjast. Ef þú mætir ekki í bókaðan tíma áttu á hættu að lenda í skammakróknum sem þýðir þú getur ekki skráð þig í ákveðna tíma í heila viku!
c. Myndataka og önnur upptaka er óheimil í Mjölni nema með sérstöku leyfi þjálfara eða forsvarsmanna Mjölnis og samþykki þeirra sem myndaðir eru. Öll myndataka eða upptaka í búningsklefum, sturtuklefum, pottasvæði eða gufubaði er stranglega bönnuð.
d. Matvæli eru ekki leyfð í æfingasölunum og drykkir skulu vera í lokuðum brúsum.
e. Tæma skal skápa í búningsklefum eftir notkun og óheimilt er að skilja eigur sínar eftir í þeim yfir nótt. Lásar á skápunum verða klipptir á kvöldin eftir lokun. Mjölnir ber ekki ábyrgð á þeim né á eigum sem skildar eru eftir í skápum eða búningsklefum.
5. VERTU ALLTAF ÞRIFALEG/UR, GÆTTU AÐ SÓTTVÖRNUM OG GAKKTU VEL UM - Við viljum enga fýlustrumpa í Mjölni, hvorki líkamlega né andlega. Þú vilt ekki vera sá/sú sem enginn vill æfa með því þú ert í óhreinum og illa lyktandi æfingafötum eða þrífur þig illa – það er lítið mál að fara í sturtu fyrir æfingu. Vertu í hreinum galla (gi) og öðrum æfingafötum, hrein/n og með vel klipptar neglur (bæði fingur- og táneglur). Mælst er til notkunar sandala þegar ekki er verið á glímudýnunum.
Ef þú ert með sár af einhverjum toga, búðu þá um það almennilega áður en þú ferð að æfa. Alls ekki mæta með sýkingar né ef þú finnur til veikinda og gættu vel að almennum og persónulegum sóttvörnum. Þetta hefur ekki bara með smekkvísi að gera heldur einnig heilbrigði iðkenda.
Þurrkum okkur áður en gengið er úr sturtuklefum inn á skápasvæði í búningsklefum og munið að rakstur er óheimill í sturtuklefum og gufubaði.
Göngum alltaf vel um æfingahúsnæðið okkar, bæði æfingasvæðin, búningsklefana, búnað, tæki og tól. Höldum tækjum og áhöldum snyrtilegum, þurrkum af þeim og sótthreinsum eftir notkun. Gangið vel frá æfingatækjum, lóðum og slíku og skiljum við hlutina eins og við viljum koma að þeim. Notið aldrei biluð tæki, búnað eða áhöld heldur tilkynnið starfsfólki um slíkt svo hægt sé að laga bilunina eða skipta þeim út.
6. STYDDU FÉLAGIÐ ÞITT OG SÝNDU ÞVÍ VIRÐINGU - Annað hvort ertu í Mjölni eða ekki. Ekkert japl, jaml og fuður. Ef þú ert í Mjölni þá keppir þú fyrir Mjölni (ef þú keppir á annað borð), tekur þín belti undir Mjölni og styður Mjölni af öllu hjarta. Þú spyrð ekki bara hvað Mjölnir getur gert fyrir þig heldur einnig hvað þú getur gert fyrir Mjölni. Og ef þú ert merktur Mjölni, hvort sem það er í keppnum eða almennt, þá hagar þú þér samkvæmt því, af smekkvísi, háttvísi og heilindum. Mundu að styrkur Mjölnis og virðing liggur hjá þér.
7. SEM IÐKANDI Í MJÖLNI SAMÞYKKIR ÞÚ AÐ:
- Lána ekki öðrum aðgang þinn.
- Fara í einu og öllu eftir tilmælum þjálfara um öryggisatriði.
- Taka fulla ábyrgð á sjálfum/ri þér við æfingar og keppni í Mjölni.
- Nota ekki kunnáttu sem þér er kennd í Mjölni við aðrar aðstæður en á æfingu nema í ýtrustu neyð.
- Fara eftir öllum skilmálum og iðkendareglum Mjölnis.
BROT Á ÞESSUM REGLUM GETUR VARÐAÐ BROTTREKSTUR ÚR FÉLAGINU
Mjölnir MMA
