Fullt hús hjá okkar mönnum í kvöld!

Okkar menn stóðu sig frábærlega á Goliath Fight Series MMA keppninni í Skotlandi í kvöld. Fyrir hönd Mjölnis kepptu þeir Aron Franz Bergmann Kristjánsson, Logi Geirsson, Steinar Bergsson og Viktor Gunnarsson. Keppninni var þrískipt og voru þeir Aron, Logi og Steinar allir í miðbiki keppninnar en Viktor Gunnarsson var í aðal bardaga kvöldsins þar sem keppt var um titilinn í Bantamvigt.

Aron var fyrstur í búrið þar sem hann mætti Talib Moad. Bardaginn stóð í allar þrjár loturnar en Aron tók Talib niður bæði í 2. og 3. lotu án þess þó að ná að klára bardagann þaðan. En þetta dugði til því Aron sigraði á klofnum dómaraúrskurði.

Næstur í búrið var Logi Geirsson gegn Shaun Sharif. Það er skemmst frá því að segja að Shaun átti aldrei möguleika í Loga sem kastaði honum í gólfið á fyrstu mínútu bardagans, tók bakið og læsti inn RNC uppgjafartaki sem kláraði bardagann á innan við mínútu. Frábær frammistaða hjá Loga.

Steinar Bergsson mætti svo Daniel Neill í síðasta bardaga þessa hluta kvöldsins. Steinar sótti grimmt strax í upphafi og lenti nokkrum góðum höggum. Í einni sókn Steinars féll Daniel í gólfið og tappaði strax út. Svo virðist sem hann hafi orðið fyrir meiðslum á hné og bardaginn því TKO Steinari í vil, sem leit mjög vel út þó bardaginn hafi verið stuttur.

Viktor Gunnarsson mætti síðan Owen Usman í aðal bardaga kvöldsins um bantamvigtar titilinn. Þar sem um titil bardaga var að ræða var hann 5 lotur (hver lota er 3 mínútur) meðan aðrir áhugamannabardagar eru 3x3 mínútur. Owen var ósigraður fyrir bardagann en Viktor sýndi yfirburði sína strax í upphafi og sótti fast og náði Owen hvað eftir annað í fellur og hafði yfirburði á gólfinu. Í lok annarrar lotu náði Viktor að skella í glæsilegan armbar en bjallan bjargaði Owen. Nokkrar sekúndur í viðbót hefðu klárað málið. Viktor tók hins vegar bakið á Usman í hverri lotunni eftir annarri og þó hann næði ekki að koma inn uppgjafartakinu vann hann mjög öruggan sigur á einróma dómaraúrskurði og kemur heim með beltið.

Okkar menn sigraðu því allir sína bardaga í kvöld og við erum ótrúlega stolt af þeim. Gunnar Nelson og Matthew Miller fylgdu strákunum út voru í horninu þeirra allra að sjálfsögðu. Í öllum bardögunum var keppt samkvæmt áhugamannareglum í MMA.