Nýir yfirþjálfarar í yoga

Dagný og Tómas eru bæði útskrifuð með grunnréttindi í yoga hjá Yoga Shala Reykjavík. Þá er Tómas einnig með framhaldskennarapróf í Brahmni Yoga á Indlandi 2015. Tómas hefur um sjö ár reynslu af samfelldri yogakennslu og hefur komið víða við, en hann er einnig stofnandi Yoga Moves sem eru yoga-, dans- og hugleiðsluviðburðir með tónlist, iðulega lifandi tónlist. Tómas hefur í tengslum við þetta haldið stóra viðburði í Hörpu, Gamla Bíói, Hofi Akureyri, á Karnivalinu á Menningarnótt sem og erlendis. Nýjasta verkefni hans er vinsæla námskeiðið „Yoga fyrir stirða stráka“ sem yfir 600 karlmenn á Íslandi hafa sótt. Tómas er bæði kennari og meðeigandi í Yogashala þar sem Dagný kennir jafnframt og vinna þau saman þar við rekstur Yoga Shala.

Dagný er að auki með kennararéttindi í Yoga Nidra frá Amrit sem hún hefur verið að kenna í Mjölni einu sinni í viku. Þá kennir hún einnig í menntaskólum og hefur verið með námskeið til að kynna yoga fyrir ungu fólki.

Tómas og Dagný hafa verið að mæta í Víkingaþrek Mjölnis í rúm tvö ár og segja það frábæra blöndu við yoga. Leggja þau áherslu á einlægni í yogakennslu sinni að kenna frá hjartanu, sjálfskoðun , öndun, líkams- og núvitund.

Á sama tíma og við þökkum Steinunni fyrir vel unnin störf bjóðum við Dagný Rut og Tómas hjartanlega velkomin til starfa.