OPNAÐ SAMKVÆMT STUNDATÖFLU

Mjölnir opnar aftur 15. apríl

Samkvæmt tilkynningu heilbrigðisráðuneytisins má íþróttastarf hefjast í skipulögðum hóptímum frá og með morgundeginum, þ.e. fimmtudeginum 15. apríl, þar sem allir þátttakendur eru að venju forskráðir í tíma. Við þessar aðstæður skal virða 2 metra regluna, ekki notast við sameiginlegan búnað og er 20 manna hámark í hvern tíma á þrekæfingar. Íþróttaæfingar með og án snertingar eru heimilaðar með fjöldatakmörkunum (sjá nánar í reglum Mjölnis hér að neðan).
 
Með þessum reglum geta skipulagðir tímar í Víkingaþrekinu, Goðaaflinu og Yoga  hafist að nýju með 20 manna hámarki í hverju rými (hólfi). Tveggja metra regla þarf þó ávallt að ríkja þannig að í sumum tímum gæti verið hámarkið verið færri en 20 manns. Gryfjan (líkamsræktarsalurinn) er opin með sömu takmörkunum og forskráningu. Búningsklefar eru opnir og hólfaskiptir og biðjum við þá sem nota þá að virða hólfaskiptinguna sem er uppsett í hverjum klefa og fer eftir tímum. Upplýsingar um það eru við inngang klefana. Við biðjum iðkendur líka aðeins að skrá sig í einn tíma á dag að hámarki meðan á þessum fjöldatakmörkunum stendur. 

Allt íþróttastarf, hvort sem það er innan ÍSÍ eða ekki, er heimilt með fjöldatakmörkunum. Tímar í glímu (BJJ), MMA, hnefaleikum og kickboxi hefjast því að nýju en við minnum á Reglur Mjölnis hér að neðan í því sambandi. Sama á við um æfingar barna og unglinga.

Við biðjum alla þá sem fengu búnað (ketilbjöllur og slíkt) að láni að skila slíku hafi búnaðinum ekki þegar verið skilað.

Barnagæsla, heitur pottur og gufa eru einnig lokuð áfram þar til annað verður tilkynnt.
 
Líkt og áður eru skýrar reglur um að hvorki iðkendur né starfsmenn mega koma inn í Mjölni ef þeir:

a. Eru í sóttkví.
b. Eru í einangrun (einnig meðan beðið er niðurstöðu sýnatöku).
c. Hafa verið í einangrun vegna COVID-19 smits og ekki eru liðnir 14 dagar frá útskrift.
d. Eru með einhver einkenni flensu eða annarra veikinda (kvef, hósta, hita, höfuðverk, beinverki, þreytu, kviðverki, niðurgang o.fl.).

Við viljum þakka iðkendum okkar sem lang flestir hafa haldið tryggð við Mjölni á þessum erfiðu tímum. Við gerum okkur fulla grein fyrir því að ástandið er víða erfitt og tryggð ykkar gerir okkur kleift að halda áfram starfsemi og eins og fram hefur komið mun Mjölnir bæta þeim tíma sem lokað var aftan við áskrift þeirra sem héldu henni virkri og halda áfram með þau námskeið sem frestað var.

Með öðrum orðum Mjölnir opnar (með takmörkunum) samkvæmt stundatöflu fimmtudaginn 15. apríl. Mikið verður gaman að fá líf í húsið aftur!

Við biðjum alla að kynna sér vel Reglur Mjölnis um sóttvarnir

Tilkynning ráðuneytisins, reglugerðin og minnisblað sóttvarnarlæknis

Leiðbeiningar Landlæknis fyrir starfsemi heilsu- og líkamsræktarstöðva vegna COVID-19

Hér er neðan er svo samantekt á helstu reglum sem gilda í Mjölni á dögum Covid um æfingar í íþróttum með snertingu, þ.e. glímu (BJJ), MMA, Kickboxi og hnefaleikum:

• Forskráning á netinu í alla tíma nema barnastarfið.
• Fjöldi á hverri æfingu er takmarkaður þannig að vel sé hægt að halda tveggja metra fjarlægð kjósi iðkendur það en þó aldrei yfir 50 í hverju rými. Unnin hefur verið tafla yfir salina og verður fjöldi á æfingum vel undir þeim fjölda sem gefinn er upp fyrir 2 metra lágmark.
• Á hverri æfingu er hópum skipt í pör eða minni hópa og einungis æft innan hvers hóps til að lágmarka nálægð og samgang.
• Allir eru með sinn æfingabúnað (galli, boxhanskar eða annar hefðbundinn íþróttafatnaður) og drykkjarbrúsa. Óheimilt er að deila búnaði með öðrum.
• Notkun á búningsklefa skal vera lágmörkuð og hólfaskipt þannig að unnt sé að halda tveggja metra fjarlægð í klefum á milli einstaklinga. Iðkendur eru hvattir til að fara í sturtu heima hjá sér til að takmarka traffík inni í klefum.
• Allir spritta sig og sótthreinsa fyrir æfingu og ef þeir þurfa að skipta um æfingafélaga.
• Aðeins þeir sem eiga erindi á æfinguna skulu vera í salnum á meðan á æfingu stendur.
• Undanþága um tveggja metra reglu fyrir iðkendur og þjálfara gildir aðeins á æfingasvæðinu, ekki utan þess.
  
  

Þá viljum við einnig minna iðkendur okkar á að ákveðin smit- og sóttkvíaráhætta fylgir ávallt því að mæta í fjölmenni, íþróttaæfingar sem og annað, á tímum sem þessum, burtséð frá öllum reglugerðum. Við hvetjum iðkendur eindregið til hafa slíkt í huga áður en þeir ákveða að mæta á æfingar.